Təqdimat mərasimini giriş sözü ilə Türk Neonatoloji Dərnəyinin rəhbəri professor Esin Koç açaraq kitab haqqında geniş məlumat verib. O, kitabın işıq üzü görməsində əməyi olan hər kəsə dərin minnətdarlığını bildirib, nəşrin bütün həkim–neonatoloqlar, eyni zamanda tibb elminin sirlərini öyrənən tələbələr üçün çox aktual və gərəkli olduğunu qeyd edib.

 

Tədbirdə kitabın redaksiya şurasının üzvü, məsləhətçi-mütəxəssisi, Mərkəzi Gömrük Hospitalının həkimi, pediatr-neonatoloq-reanimatoloqu Təranə Göyüşova çıxış edib.

 

“Ümumdünya Səhiyyə Təşkilatının məlumatına görə, 2019-cu ildə dünyada 5 yaşa qədər uşaqlar arasında ölüm hallarının təxminən 47%-i yenidoğulmuş dövrdə meydana gəlir, onlardan təxminən üçdə biri doğulduqdan 24 saat sonra və dörddə üçü həyatlarının ilk həftəsində ölür", - deyə T.Göyüşova qeyd edib. 

 

Həkimin sözlərinə görə, dünyada hər gün təxminən 6700 yeni doğulmuş uşaq ölümü qeydə alınır və əksər hallarda yenidoğulmuşların ölüm səbəbi erkən doğum, doğum asfiksiyası və ya doğuş zamanı tənəffüsün olmaması, infeksiyalar və anadangəlmə qüsurlardır. Neonatoloqların işində yenidoğulmuşların müalicəsində respirator terapiya ən vacib komponentlərdən biridir. Son illərdə tənəffüsə dəstək strategiyasının sürətli inkişafı nəticəsində həkimin əlində noninvaziv dəstəkdən mexaniki ventilyasiyaya qədər bir neçə növ seçim var.

 

"Kitabın mündəricatına nəzər salsaq görərik ki, tənəffüsün fiziologiyasından və tənəffüsün dəstəkləmə prinsiplərindən başlayaraq fərqli növ mexaniki ventilyasiya dəstəyinə qədər müalicə üsulları göstərilmiş və çoxlu sayda qrafik və cədvəllər ilə aydın izah edilmişdir",  - həkim bildirib.