Çoxdöllü və ya əkiz hamiləlik ana bətnində iki və ya daha artıq rüşeymin (körpənin) formalaşdığı hamiləlikdir. Bütün doğuşların yalnız 3%-i çoxdöllü və ya əkiz hamiləliklər təşkil edir və bu nisbət günü-gündən artmaqdadır.

Süni mayalandırma zamanı bətn daxilinə köçürülən embrion sayının artması çoxdöllü və əkiz hamiləliklərin sayının artmasının əsas səbəblərindəndir. Çoxdöllü və əkiz hamiləliklər vaxtından qabaq doğuş və körpənin inkişaf problemləri kimi müxtəlif risklər daşıyırlar. Bu səbəbdən hamilə ananın çoxdöllü və ya əkiz körpə daşıdığı məlum olduqdan sonra hamiləlik və körpənin inkişafına nəzarət üçün perinatoloqa (riskli hamiləliklərə nəzarət edən ginekoloq) müraciət etməsi məsləhətdir.

Əkiz hamiləliklərin yarısı, çoxdöllü hamiləliklərin isə demək olar ki, hamısı hamiləliyin 37-ci həftəsindən əvvəl doğur, yəni çoxdöllü və əkiz hamiləliklər əsasən vaxtından qabaq doğuş ilə nəticələnir.

Çoxdöllü və ya əkiz hamiləlikli analarda hamiləlikdən asılı yüksək təzyiqin rastgəlmə tezliyi normal hamiləliklərə görə 3 dəfə daha çoxdur. Körpədə sinir borusu defekti, ürək və həzm sistemi anomaliyalarının rastgəlmə tezliyi normal hamiləliklərlə müqayisədə təxminən 2 dəfə çoxdur. Həmçinin düşüklə nəticələnməsi riski normal hamiləliklərə nisbətən daha çoxdur. Əlillik riski, döllərdə qüsurun yaranma riski yüksək olur. Eyni zamanda, müəyyəm hallar üçün ana bətninə cərrahi müdaxilə edilir.

Çoxdöllü hamiləliyi olan qadının zülala,kaloriyə və dəmirə olan ehtiyacı daha çoxdur. Hamiləliklərdə mümkün ola biləcək ağırlaşmaları vaxtında müəyyən etmək üçün həkim tərəfindən təyin olunan görüş sayı artırılmalıdır. Bunlardan əlavə, hamilə qadının evdə və ya xəstəxanada yataq rejimində istirahətinə ehtiyac ola bilər. Ən əsası isə, əkiz hamiləliklərlə təcrübəsi olan mütəxəssisin daimi müşahidəsi altında olmaq və məsləhətlərini bütün incəliklərinə qədər yerinə yetirməkdir.

uzman, mama-ginekoloq Turab Canbaxışov

Aztibb.az