Azərbaycan Tibb Universitetinin (ATU) tələbələri beynəlxalq yarışmada yüksək yer tutublar. Universitetin II Müalicə-profilaktika fakültəsinin V və VI kurs tələbələri Leyla Gəncəliyeva ilə Ədalət Gəncəliyev IFMSA-InSimu III Beynəlxalq Diaqnostika Çempionatında 1000-dən çox iştirakçı arasında 5-ci yerə çıxıblar.

Onlayn formatda keçirilən çempionatda 90 ölkədən 419 komanda (ümumilikdə 1068 iştirakçı) yarışıb. Onlar 3 gün ərzində fərqli mövzular üzrə 1 saatlıq müsabiqədə iştirak ediblər. ATU-nu təmsil edən Gəncəliyevlərin komandası ilk beşlikdə qərarlaşıb.

Qeyd edək ki, diaqnostika üzrə çempionat artıq üçüncü dəfədir təşkil olunur. Yarışmanın hədəfi qeyri-dəqiq diaqnozların qoyulması ilə mübarizənin təbliğidir. Bu onlayn təşəbbüs dünyanın hər yerindən tibb tələbələrinə kliniki biliklərini müqayisə etməyə və paylaşmağa imkan verir.