Həkim məsləhəti olmadan azyaşlıya hansısa dərman, hətta vitamin də olsa vermək onun üzərində təcrübə aparılmasına bənzəyir.

Bəzi valideynlər gecələri pis yatan, həddən artıq aktiv olan uşaqları sakitləşdirmək üçün onlara valeryan məhlulu verir və onun zərərsiz olduğunu düşünürlər. Kardioloq tərəfindən müayinə olunmayan uşağa ürək sakitləşdirici dərman vermək qətiyyən düzgün addım deyil.

Əgər uşaqda nevroloji problem müşahidə olunursa, özbaşına müalicə əvəzinə mütəxəssisə müraciət etmək lazımdır. İstənilən halda dərman uşağa mütəxəssis rəyi olmadan verilməməlidir.

Uşaqda əl və ayaq soyuqluğu, dərinin göyərməsi qan dövranının pozulmasından xəbər verir. Hər hansı səbəbdən ümumi qan dövranını pozulub və bu halda kardioloji müayinə mütləqdir.

Bəzən valideynlər böyüdükcə uşağın ürək döyüntüsünün azalmasından narahatlıq hissi keçirirlər, halbuki, bu, normal haldır. Körpə doğulanda ürək döyüntüsü 130-150-dən başlayır. Uşaq böyüyüb yetkinlik yaşına çatdıqda həmin göstərici 70-80-ə enir. Ona görə də valideynlərin uşağın ürək döyüntülərinin aşağı olması ilə bağlı narahatlığı əsassızdır.

invaziv kardioloq Elşən Rzayev 

Aztibb.az