Mən bu gün uşaqlarda analar tərəfindən yol verilən bəzi qidalanma xətaları haqqında məlumat vermək istəyirəm. Ən birinci əziyyət çəkdiyimiz mövzu uşaqlarda şirin çayın, şirin suların, kəmşirin çay və suların verilməsidir. 

Ümumiyyətlə, belə suların uşaqlara verilməsi istənilən yaşda qadağandır. Ələlxüsus, yenidoğulmuş dövründə belə çay və sular verilir, amma bu heç bir halda düzgün deyil. Şirin çay, ümumiyyətlə, verilməməlidir. Çünki bunlar asan mənimsənən karbohidratlardır və uşaqlar onu qəbul etdikdən sonra onların bol vitaminli, proteinli və normal sağlam karbohidratların orqanizmə daxil olmasının qarşısı alınır.

Su çox mübahisəli məsələdir. Mən həmişə deyirəm – “Ana südü vasitəsi ilə 6 aya qədər uşaqlar suyu da, hər bir qidanı ala bilirlər.” Amma əlavə qidaya keçdikdən sonra təklif oluna bilər. Əgər uşaq içərsə, verilə bilər. İçməsə, yenə ana südün tərkibində o suyunu alır. Amma suya hər hansı bir qatqı qatıb uşağa sevdirmək düzgün deyil. Ələlxüsus, ana südünü tərgidən dövrlərdə uşaqlara şirin çay təqdim olunur.

Ümumiyyətlə çay, qəhvə və kakao və kofein tərkibli maddələrin uşaqlara 3 yaşa qədər kalsiumun mübadiləsinə təsir etdiyi üçün verilməsi münasib deyil. Onsuzda uşaqlar faydalı yolla karbohidratı alır. Məsələn: alma, banan, digər meyvə və tərəvəzlərdən.

Yəni konkret surətdə uşağa su adi formada verilməlidir. Kompot kimi, meyvə üzərinə qaynar su töküb onu soyudaraq da verə bilərsiniz.

Çox xahiş edirəm bütün valideynlərimizdən şirin su, şirin çay, kəmşirin su və kəmşirin çayı uşaqlara verib sevdirməsinlər. Qidalanmanı, karbohidratları, şəkəri tamamən təbii, daha düzgün mənbədən uşaqlara təklif etsinlər.

pediatr Gülnar ABDULLAYEVA

Aztibb.az