Həkim reportajı: Revmatik xəstəliklər və simptomları

Həkim reportajı: Revmatik xəstəliklər və simptomları

19.08.2021 16:40

Revmatik xəstəliklər çox geniş bir qrupu əhatə edir. Bildiyimiz kimi, təkcə oynaq xəstəlikləri deyil. Çünki ilk planda ağrı sümüklərdə, oynaqlarda olduğu üçün dədə-babadan qalan bir fikir var ki, əgər sadəcə oynaq ağrısı varsa, bu, revmatik xəstəlik deməkdir. Heç də elə deyil.

Bir çox revmatik xəstəliklər var ki, onlarda oynaq problemi ilə yanaşı, qarın ağrısı – məsələn, FMF xəstəliyində, qızdırma, sidikdə, böyrəklərdə digər problemlər yaranır.

Bəzi xəstələrdə ağız yaraları özünü göstərə bilir, məsələn, Lupus xəstəliyində, Beçet xəstəliyində, hansı ki, bunlar revmatik xəstəliklərin növləridir.

Bəzilərində dəri əlamətləri özünü göstərə bilir. Bu xəstələrdə dəridə damarlar sanki üzdə imiş kimi görünür. Buna “Livedo reticularis görünümü” deyirlər. Venoz damarlar ətraflarda – əllərdə, ayaqlarda, budda, bazuda, sanki elə bil dərinin altından sezilir. Sanki damarların xəritəsi çəkilmiş kimi olur. Əslində bu bir simptomdur,bizi xəbərdar edən simptom. Bu revmatik xəstəliklərin bir göstəricisidir.

Yaxud bəzi xəstələrdə dırnaqlardakı quruluşlardan – məsələn, barmaqlarda, oynaqlardakı deformasiyadan bu nəticəyə gəlmək olar. Bəzən də üz mimikasına baxdıqda xəstələrin burunla ağız arası qisimdə qırışlar əmələ gəldiyini görürük. Bu qırışlar əslində qocalıq qırışları ilə eyni deyil, fərqlidir. Bunlar dəridə gedən kollagen toxumasının patoloji proseslərinə bağlı olaraq ortaya çıxır, məsələn, sklerodermiyada, sistemik sklerozda və s.

Belə xəstələr ağızlarını yaxşı aça bilmilər. Rahat gülə bilmirlər. Xəstə əziyyət çəkdiyini bildirir. Sanki maska-üz kimi bir quruluş əmələ gəlir bu xəstələrdə.

Və yaxud da udqunmada problem ola bilir. Bu, mədə-bağırsaq sistemi problemləri ilə səhv salınır. Biz ona “ezofaqus dismotiliti”si deyirik. Hansı ki, skledermiyada görülmüş şikayətlərdən biridir.