Azərbaycan Respublikası Səhiyyə Nazirliyinin baş stomatoloqu, Azərbaycan Tibb Universitetinin ortopedik stomatologiya kafedrasının müdiri Nazim Pənahov stomatoloq və pasiyentləri gigiyena qaydalarına ciddi əməl etməyə səsləyib.
O, pasiyentlərin stomatoloq qəbulunda olduqları zaman hər iki tərəfin özlərini qoruması üsullarından danışıb. Bildirib ki, bu sahənin peşəkarları pandemiyadan öncə də müxtəlif xəstəliklərdən qorunmaq üçün zəruri qaydalara əməl edirdilər. Bura əlcək və maska geyinilməsi, iş sahəsinin təmizlənməsi daxildir. Lakin həkimin vəzifəsi, ilk növbədə, özünü qorumaqdan ibarətdir.
Nazim Pənahov qeyd edib ki, pandemiya hər bir sahəyə təsir etdiyi kimi, stomatologiyaya da təsirsiz ötüşməyib və yeni tələblər ortaya çıxarıb. Həkimlərin riayət etməli olduqları bir sıra qaydalar mövcuddur.
Ölkənin baş stomatoloqu vətəndaşlara da tövsiyələrini verib. Onun sözlərinə görə, diş ağrısı yaranan zaman müalicə labüddürsə, həkim yanına getmək lazımdır. Əks halda, ağırlaşmalar ola bilər. Lakin diş həkiminə getmək məcburi deyilsə, bəzi prosedurları pandemiya bitdikdən sonraya saxlamaq olar.
N.Pənahov əlavə edib ki, vətəndaşlar xəstəxanaya gedərkən, mütləq şəkildə onların bədən hərarəti ölçülür: “Yalnız bundan sonra pasient ayağına baxil geyinərək içəri daxil ola bilər. Xəstə stomatoloq otağına yaxınlaşanadək maskada olmalı və qəbul bitdikdən sonra yenidən maska geyinərək xəstəxanadan çıxmalıdır”.