Qulaq tıxanıqlığı tez-tez görülən şikayətdir. Soyuqdəymə səbəbiylə, qulağa su getmə, qulaq kirinin içəriyə tıxanması, bəzən sinusit, allergiya,orta qulaq iltihabı, miqren, qrip və ya bir təyyarə səyahəti zamanı təzyiq dəyişikliyi kimi bir çox səbəblər qulaq tutulmalarına gətirib çıxara bilər.

Qulaq tıxanıqlığı ciddi bir problemə səbəb olmaz. Qulaq damcısı və ya sadəcə gözləməklə həll edilə bilər. Ancaq 5 və ya 7 gündən çox davam edən qulaq tutulması zamanı həkimə müraciət etmək lazımdır. Bəzən də yaranan iltihabi proses təhlükəli olub, eşitmə pozğunluğuna gətirib çıxara bilir.

Xüsusilə soyuqdəymə səbəbiylə uşaqlar qulaq tutulması ilə daha çox qarşı-qarşıya qalırlar. Həmçinin sinusit, infeksiya qaynaqlı ola bilər. Əgər körpənin şikayəti bir həftədən çox davam edirsə, allergik mənşəli ola bilər. Körpələrin və kiçik uşaqların qulaqları tıxandığı zaman mütləq həkimə müraciət etmək lazımdır.

Qulaq tıxanıqlığının müalicəsi tıxanıqlığa səbəb olan faktora görə dəyişir. Bu səbəblə hər hansı bir müalicəyə başlamadan əvvəl qulaq tıxanıqlıqının səbəbini öyrənmək lazımdır. Qulaqlarda olan qulaq kiri yumuşaldıcı krem, zeytun yağı və s. ilə təmizlənə bilər. Bundan başqa, təyyarələrdə təzyiq fərqi səbəbi ilə qulaqda tıxanma yaranarsa, əsnəmək və ya saqqız çeynəmək, müxtəlif üz və ağız hərəkətləri etməklə qulaqların açılmasına nail olmaq olar. Qulaq tıxanıqlığının qarşısını almağın bir digər yolu da qulaqları davamlı olaraq təmizləməkdir. Həmçinin bir sıra xalq təbabəti üsulları da vardır ki, bunun qarşısını ala bilər.

Qulaq infeksiyası müalicəsi ancaq həkimin təklif etdiyi antibiotik və ağrı kəsicilər ilə həyata keçirilir.Qulaqda şiddətli ağrı, qusma, axıntı, istilik varsa, bu infeksiyaya işarədir. İnfeksiya qaynaqlı qulaq tıxanıqlığı zamanı dərhal həkimə gedilməlidir.

otorinolarinqoloq Yusif HACIYEV

Aztibb.az