Məlumdur ki, COVID-19 pandemiyası, ilk növbədə, insanların psixikasına və psixoloji durumuna təsir göstərir. Psixiatrlara müraciət edən pasiyentlər daha çox əhval-ruhiyyənin aşağı olması, həyəcan, təşviş, yuxu və qida pozuntularından şikayətlənirlər.
Bunu Azərbaycan Tibb Universitetinin (ATU) Psixiatriya kafedrasının professoru Zəfər Əliyev bildirib. Professor vəziyyətin kifayət qədər gərgin olduğunu deyib: "Son aylar bütün dünyada olduğu kimi, ölkəmizdə də bəzi psixi pozuntuların sayı artmağa başlayıb. Belə ki, depressiya, təşviş və obsessiv-kompulsiv pozuntular daha çox nəzərə çarpır".
Son dövrlər psixiatrlara müraciət edənlərin sayının çoxaldığını söyləyən mütəxəssis karantin rejiminin sərtləşdirilməsi və yumşaldılmasının, insanların həftəsonu evə qapadılmasının mənfi təsirlərini aradan qaldırmaq üçün tövsiyələrini də bölüşüb: "Karantin rejiminin tətbiqi zamanı sərtləşdirmələr və həftəsonu qapadılmalar insanların daha çox gün işığına təlabatının olduğu indiki dövrdə onların sağlamlığına mənfi təsir göstərir. D vitamini immuniteti möhkəmləndirməklə yanaşı, bəzi psixi pozuntularda, xüsusilə depressiya zamanı əhəmiyyətlidir. Hazırda müraciət edən pasiyentlərin müayinəsi zamanı onlarda 80-90% halda D vitamini defisiti müşahidə olunur”.
“Payızda depressiyaların artması ehtimalı yüksək olduğundan yay aylarında günəş vannası qəbul etmək vacibdir”, – deyə Z.Əliyev vurğulayıb.