İyulun 17-də Qurban bayramı münasibətilə Müdafiə Nazirliyinin Şəxsi Heyət Baş İdarəsinin Qadınlar və hərbi qulluqçuların ailələri ilə iş üzrə şöbəsi və Bakı Şəhər Mədəniyyət Baş İdarəsinin birgə təşkilatçılığı ilə bir qrup Vətən müharibəsi şəhidinin və qazisinin oğlan övladlarının sünnət olunması üzrə xeyriyyə aksiyası keçirilib.

Müdafiə Nazirliyinin mətbuat xidmətindən bildiriblər ki, tədbirdə iştirak edənlər şəhid və qazi övladlarına dövlətimizin rəhbərliyi, Müdafiə Nazirliyi tərəfindən hər zaman xüsusi diqqət və qayğı göstərildiyini qeyd ediblər. Bildirilib ki, şəhidlərimizin xatirəsini yad etmək hər birimizin ən müqəddəs borcudur.

Sünnət olunan uşaqların kirvəsi Xalq artisti Alim Qasımov olub.

Xeyriyyə aksiyasının bundan sonra ayda bir dəfə şənbə günləri həyata keçiriləcəyi planlaşdırılır.

Xeyirxah aksiyada iştirak edən şəhid və qazi ailələri dövlətimizin onlara olan xüsusi diqqət və qayğısından razılıq edib, bu aksiyanın təşkilatçılarına təşəkkürlərini bildiriblər.