Açıq havada olan hovuz suyunda günəş istiliyinin təsiri ilə bakteriyalar və göbələklər yayılmağa başlayır ki, bu da insan sağlamlığı üçün təhlükəlidir.
Aztibb.az xəbər verir ki, bakteriya və virusların gözdə qızartı yarada biləcəyini bildirən mütəxəssislər xüsusilə hovuzların böyük bir risk daşıdığını vurğulayırlar. Ciddi infeksiyalara və gözdə keratit problemlərinə səbəb ola biləcək epidemik infeksiyalar adenovirus infeksiyası dediyimiz virusların yaratdığı göz problemləridir. Bu virusu daşıyan insanların gözlərindəki və tənəffüs yollarındakı selik xəstəliyin yayılmasına səbəb olur.
Adenovirus konyunktiviti olan xəstələrin çirklənmiş göldə, bulanıq dənizdə, hovuzda çiməmələri məsləhətdir. Bu xəstəlik adenoviruslar tərəfindən törədilən gözün selikli qişasının kəskin infeksion zədələnməsidir.
Bu xəstəliyin simptomları gözdə qızartı, sancma, sulanma, qaşınma, limfa düyünlərinin şişməsi və s. hallardır. Xəstəlik yüksək temperatur və nazofaringitlə də təzahür edir.
Əgər ümumi hovuzlardan istifadə edilirsə, üzgüçülük eynəkləri taxılmalı, hovuzda gözlər açılmamalı, linzalardan istifadə edildiyi təqdirdə isə hovuza linzalarla girməməlidir. Dezinfeksiya edilməmiş hovuz suyundan gözlərə bakteriya, virus və ya parazit tez yoluxa bilir. Bundan başqa, hovuzdakı təhlükə yalnız təmizlənməmiş su deyil. Dezinfeksiya üçün suya həddən artıq xlor və müxtəlif dərman vasitələrinin vurulması da gözlərə zərər verə bilər.