Hazırda “qara kif” xəstəliyi bir çox ölkədə sıx rast gəlindiyi üçün araşdırılır. Xəstəlik tibbdə mukormikoz adı ilə tanınır.
Aztibb.az xəbər verir ki, daha çox Hindistan, Misir, İraq və Meksikada görülən “qara kif” xəstəliyi son həftələr bütün dünyada çaxnaşmaya səbəb olub. Cəmiyyətdə bu xəstəliyin nə olduğu və necə yoluxması ilə bağlı böyük narahatlıq var.
“Qara kif” xəstəliyi nədir, necə ötürülür?
“Qara kif” daha çox pandemiya ərəfəsi Hindistanda yayılmağa başladı. Burun, göz və beyinə təsir edən bu xəstəliyin ölümcül olma riski də var. Xəstəlik ağ ciyərlərə də təsir edir. Mukormikoz diabet, xərçəng və QİÇS xəstələri, eləcə də immunitet sistemi ciddi dərəcədə zəifləmiş insanlar üçün ölümcül ola bilər.
“Qara kif” xəstəliyi ümumiyyətlə torpaqdan, bitkidən, gübrədən və çürüyən meyvə-tərəvəzdən yoluxur. Xəstəlik bu məhsullarla təmas nəticəsində ötürülür.
Son aylarda Hindistanda mukormikoz infeksiyası koronavirusa tutulmuş minlərlə insanda rast gəlinib.
Həkimlər bunun koronavirus xəstələrinin müalicəsində istifadə edilən steroidlərlə əlaqəli olduğunu söyləyirlər. Ölkədə koronavirusdan sağalanlarda “qara kif”ə yoluxmaların sayı artmaqdadır. Həkimlər mukormikoz infeksiyasının əlamətlərinin koronavirus xəstələrində sağalmalarından 12-18 gün sonra bilindiyini söyləyirlər. Artıq ölkədə epidemiyadan zərər çəkən xəstələrin müalicəsi üçün yaradılan yeni mərkəzlər sürətlə dolmaqdadır.
“Qara kif” xəstəliyinin əlamətləri hansılardır?
Xəstəlik şiddətli baş ağrısı, burun qanaxması, bədənin qismən iflic olması, süstlük, qaralma və ya rəng dəyişikliyi, bulanıq görmə, sinə ağrısı, tənəffüs çətinliyi, qanlı öskürək və digər simptomlarla tanınır.