Livandan olan Darinə Bərbər heyrətamiz iradə gücü nümayiş etdirib. Uşaqlıq illərində - 28 il əvvəl sümük xərçəngi nəticəsində bir ayağı amputasiya olunmuş bu qadın “divara söykənərək uzunmüddətli oturma” hərəkəti üzrə “Ginnesin Rekordlar Kitabı”na düşüb. O, 2 dəqiqə 8 saniyə ərzində bir ayağı və digərini əvəz edən protez ayaqla qadın rəqiblərini üstələyə bilib.
Divara söykənərək oturma hərəkəti “Ginnesin Rekordlar Kitabı” görmə, hərəkət və əqli qüsurları olan insanlar arasında keçirilən yarışlardan biridir. Dubayda keçirilən bu müsabiqədən qələbə ilə ayrılan livanlı D.Bərbər deyib: “Mən 1993-cü ildə sümük xərçəngi nəticəsində bir ayağımı itirmişəm. Amma 28 ildən sonra da fiziki gücümü qoruyaraq rekorda imza ata bildim. Düşünürəm ki, bu qələbəm dünyadakı milyonlarla fiziki qüsurlu insanlar üçün ilham mənbəyi olacaq. Bu fəlakəti yaşamış hər kəs iradə gücünü qoruduğu vaxt qüsurlu sayılmır. “Ginnesin Rekordlar Kitabı”na düşməyim mənim kimi insanların həyatını müsbət istiqamətdə dəyişə bilər”.
Rekorda imza atan qadına sertifikat təqdim edən “Ginnesin Rekordlar Kitabı”nın direktoru Adam Braun deyib ki, bu cür müsabiqələrə dünyanın hər yerindən minlərlə fiziki qüsurlu insanları cəlb etmək istəyir. O əlavə edib ki, fiziki, əqli və görmə qüsurlu insanlar üçün yeni təşəbbüslər irəli sürüləcək.