Səhiyyə sahəsində kadr potensialının artırılması yollarının araşdırılması və yol xəritəsinin müzakirəsi məqsədilə TƏBİB-in İdarə Heyətinin sədri Ramin Bayramlı və məsul şəxslərin iştirakı ilə Azərbaycan Dövlət İqtisad Universitetinin (ADİU) Biznes Məktəbinin heyəti arasında görüş keçirilib.

 

Aztibb.az xəbər verir ki, öncə Ramin Bayramlı çıxış edərək səhiyyə sisteminin inkişaf etdirilməsi istiqamətində tibbi təhsilin keyfiyyət mexanizminin artırılmasının vacibliyini vurğulayıb, ixtisaslı kadrların hazırlanması istiqamətində dayanıqlı təhsil inistutlarının rolundan bəhs edib.

 

ADİU Biznes Məktəbinin direktoru Nazim Hacıyev öz çıxışında səhiyyənin idarəolunması proqramı üzrə magistratura təhsili haqqında məlumat verərək, bu proqramın səhiyyə sisteminin transformasiyasında və keyfiyyətli tibbi xidmətlərin təşkilində olduqca böyük önəm daşıdığını bildirib.

 

Daha sonra səhiyyə idarəetməsi və təşkili sahəsində mütəxəssis kadrların yetişdirilməsi, eləcə də mövcud kadr ehtiyatının təkmilləşdirilməsi istiqamətində fikir mübadiləsi aparılıb, bu sahədə əməkdaşlığın mümkün perspektivləri müzakirə edilib.