Görüşdə millət vəkili və Heydər Əliyev Fondunun Beynəlxalq əməkdaşlıq şöbəsinin müdiri Soltan Məmmədov, TƏBİB-in İdarə Heyətinin sədri Ramin Bayramlı, Şamaxı Rayon İcra Hakimiyyətinin başçısı Tahir Məmmədov, Səhiyyə Nazirliyinin Səhiyyənin təşkili şöbəsinin müdiri Anar İsrafilov, İcbari Tibbi Sığorta üzrə Dövlət Agentliyinin Beynəlxalq Əməkdaşlıq Şöbəsinin müdiri Ruslan Abdullayev, Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı və sadalanan qurumların digər əməkdaşları iştirak edib.

 

Qeyd edək ki, ÜST-ün Azərbaycandakı nümayəndəliyi və TƏBİB tərəfindən həyata keçirilən layihə ABŞ-ın Beynəlxalq İnkişaf Agentliyi (USAID), Böyük Britaniyanın Azərbaycandakı səfirliyi və UHC-Əməkdaşlıq Təşəbbüsü (ÜST-ün tərəfdaşları ilə ortaq layihəsi) tərəfindən maliyyələşdirilir.

 

Layihənin birinci mərhələsi ərzində keçirilən fokus qrup müsahibələri və sosial sorğu vasitəsilə səhiyyə işçilərinin öyrənmə ehtiyacları, ilkin səhiyyə sisteminin ehtiyacları və yerli icmaların səhiyyə ilə bağlı əsas ehtiyacları müəyyənləşdirilib.

 

Həmçinin, Şamaxıda təlim mərkəzi yaradılaraq tibb işçilərinə təlimlər keçirilməsinə və gərəkli tibbi avadanlıq alınaraq ilkin səhiyyə müəssisələrinə paylanılmağa başlanılıb.