Pensilvaniya Universiteti və Penn Perelman Tibb fakültəsi əczaçılarının apardıqları yeni araşdırmalara görə, qan nümunələrindən çıxan buxarın qoxusu əsasında aparılan analiz nəticəsində bir sıra xərçəng xəstəliyi növlərini 95%-ə qədər dəqiqliklə müəyyən etmək mümkündür.
Aztibb.az xəbər verir ki, yeni hazırlanmış süni intellekt qan plazması nümunələrindəki hüceyrələrin buraxdığı uçucu üzvi komponentlərin qarışığını deşifrə edir. Penn Universitetində hazırlanan yeni vasitənin mədəaltı vəzi və yumurtalıq xərçəngi kimi aşkarlanması çətin olan xəstəliklər üçün tətbiqi planlaşdırılır. Nəticələr isə 4 iyun tarixində Amerika Klinik Onkoloji iclasında təqdim ediləcək.
“Tədqiqat hələ başlanğıc mərhələsində olsa da, tapıntılar çox ümid vericidir. Xərçəng şişlərini həm erkən, həm də inkişaf etmiş mərhələlərdə aşkar edə biləcəyik. Bu metod işlənib hazırlandıqdan sonra müayinə standart qan analizi testləri ilə də aparıla bilər” , – deyə Penn Universitetinin professoru Çarli Conson bildirib.