TƏBİB-in İdarə Heyəti yanında Tibbi Elmi Komitə ilə Türkiyənin Səhiyyə Nazirliyinin Koronavirusla mübarizə Elmi Şurası arasında hazırkı vaksinasiya prosesinin müzakirəsi edilməsi və bu sahədə təcrübə mübadiləsinin aparılması məqsədilə videokonfrans formatında görüş keçirilib.

Aztibb.az xəbər verir ki, görüşdə TƏBİB-in İdarə Heyətinin sədri Ramin Bayramlı, Türkiyə Respublikasının Səhiyyə nazirinin müavini Tolqa Tolunay, Türkiyə Repsublikasının Avropa Birliyi və Xarici Əlaqələr Baş İdarəsinin rəhbəri Selami Kılıç, professor Erhan Akdoğan, İcbari Tibbi Sığorta üzrə Dövlət Agentliyinin Beynəlxalq əməkdaşlıq şöbəsinin müdiri Ruslan Abdullayev, Səhiyyə Nazirliyinin Tibbi yardımın təşkili şöbəsinin müdiri Səbinə Əhmədova, Səhiyyənin təşkili şöbəsinin müdiri Anar İsrafilov və TƏBİB-in Elmi Komitəsinin üzvləri iştirak ediblər.

Tədbiri açan İdarə Heyətinin sədri Ramin Bayramlı və nazir müavini Tolqa Tolunay hər iki elmi qurum üzvlərini COVID-19 ilə mübarizə çərçivəsində iki qardaş ölkədə görülən işlər və vaksinasiyanın gedişi barədə məlumatlandırıblar.

Daha sonra COVID-19 xəstəliyi əleyhinə Türkiyəli alimlər tərəfindən tapılan vaksinin klinik tədqiqatlarının 3-cü fazasının Azərbaycanda da aparılması üzərində fikir mübadiləsi aparılıb və ümumi razılığa gəlinib. Bu istiqamətdə atılacaq növbəti addımların koordinasiya edilməsi qərarlaşdırılıb.

Eyni zamanda, görüşdə COVID-19 xəstəliyinin diaqnostikası, müalicəsi və vaksinasiya ilə əlaqədar Türkiyədə yerinə yetirilən tədqiqatların nəticələri barədə məlumatlar verilib, qarşlıqlı maraq doğuran suallar cavablandırılıb.