Bakıdan dəvət olunmuş pediatr-endokrinoloq Nabat Ağayeva Salyan Rayon Mərkəzi Xəstəxanasında “Tip 1 şəkərli diabetli uşaqlarda insulin terapiyası” mövzusunda seminar keçib.

Seminarda Salyan, Neftçala, Biləsuvar, Hacıqabul, Şirvan, Saatlı və Sabirabad rayonlarından uşaq pediatrları və digər sahə həkimləri iştirak ediblər.

Nabat Ağayeva diabetli uşaqlarda insulin terapiyasının xüsusiyyətləri, xəstəliyin gedişatı, insulin enjeksiyonu, diabetik qidalanma və s. barədə məlumat verib. Məruzəçi bildirib ki, şəkərli diabet dünyada ən geniş yayılmış xəstəliklərdən biridir. Şəkərli diabetin iki tipi ayırd edilir. Birinci tip şəkərli diabetdə xəstələrin orqanizmində insulin hormonu sintez olunmur və onlar insulindən asılı olurlar. İkinci tipdə isə insulin orqanizmdə istehsal olunur, lakin hüceyrələrin insulinə qarşı həssaslığı azalır. 

Həkim əlavə edib ki, ən ağır forma birinci tip şəkərdir, uşaq yaşlarından başladığı üçün onlar erkən yaşlarda əlil ola bilirlər. 1 tip diabet diaqnozu qoyulan uşaqların gündəlik insulin inyeksiyalarına ehtiyacı var. Xəstəliyin gedişatı aqressiv olduğuna görə əksər hallarda müalicə effektiv nəticə vermir. Xəstə şəkərli diabeti həyat tərzinə çevirməlidir. 

Sonda mövzu ətrafında müzakirələr aparılıb, suallar cavablandırılıb.