Yunan alimlərinin apardığı araşdırmaya əsasən 100 il əvvəl tapılmış vərəm peyvəndinin koronavirusa qarşı təsirli ola biləcəyi müəyyən edilib. Təcrübədə vərəm peyvəndinin tətbiq olunan yaşlılarda COVID-19-a qarşı 68% təsirli olduğu bilinib. Mütəxəssislərin fikrincə, dəqiq nəticələr üçün açıqlama hələ tezdir, lakin bu araşdırmalar xəstəliklə mübarizəyə ümid vəd edir.

Aztibb.az xəbər verir ki, vərəm peyvəndi ötən əsrin əvvəllərindən bəri istifadə edilir. Onun koronavirusa qarşı təsirli ola biləcəyini öyrənmək üçün bundan əvvəl də tədqiqatlar aparılıb.

Siçanlarla aparılan tədqiqatlar göstərir ki, “VPM1002” vərəm peyvəndi immunitet sistemini stimullaşdıraraq COVID-19 kimi viral infeksiyaları zəiflədir, bədəndə immunitet sisteminin qorunmasına imkan yaradır.

İngilis alimləri də 100 il əvvəl hazırlanan vərəm peyvəndi “BCG”nin COVID-19-un səbəb olduğu sətəlcəm və  digər xəstəliklərin qarşısını ala biləcəyi fikrini irəli sürüblər. Tədqiqatçılar “BCG”nin koronavirusa qarşı təsirini müəyyənləşdirmək məqsədilə İngiltərədə, Avstraliyada, Hollandiyada, İspaniyada və Braziliyada aparılan testlərə on mindən çox adamın qatıldığını bildiriblər.