Azərbaycan Tibb Universitetinin (ATU) Tədris Terapevtik Klinikasında COVID-19 pandemiyasına həsr olunan konfrans keçirilib.

Aztibb.az xəbər verir ki, tədbiri klinikanın direktoru, professor Surxay Musayev açaraq, ölkəmizdə qonaq olan Türkiyənin Qazi Universitetinin professorlarını və konfrans iştirakçılarını salamlayıb.

O, ATU ilə Qazi Universiteti arasındakı əlaqələrdən, o cümlədən tələbə mübadiləsindən, rezidentlərimizin keçdiyi praktik təcrübədən danışıb. Bildirib ki, pandemiya dövründə başqa universitetlər rezidentləri qəbul etmədiyi halda Qazi Universiteti rezidentlərimizi qəbul edib və onların təhsil almasına şərait yaradıb. Buna görə klinikanın direktoru həmin universitetin nümayəndələrinə minnətdarlığını bildirib.

Sonra Qazi Universitetinin Tibb fakültəsinin dekanı, professor Mustafa Necmi İlhan “Dünyada və Türkiyədə COVID-19 pandemiyası və onun səhiyyə sisteminə təsiri” mövzusunda geniş məruzə edib. Natiq COVID pandemiyası ilə bağlı hazırda dünyadakı vəziyyət, onun fəsadları, eləcə də ölkələrin iqtisadiyyatlarına vurduğu ziyanlarla bağlı iştirakçılara ətraflı məlumat verib.

Daha sonra Qazi Universitetinin tibb elmləri fakültəsinin dekanı, professor Bülənt Elbasan pandemiya müddətində insanların fiziki aktivliyinin azalmasının təhlükələrindən bəhs edib, müxtəlif yaş qrupları arasında aparılan təcrübə və nəticələrlə bağlı fikirlərini bölüşüb.

Sonda ATU-nun II daxili xəstəliklər kafedrasının assistenti Könül İsmayılova “COVID-19 pandemiyası – Azərbaycan Tibb Universitetinin təcrübəsi” mövzusunda çıxış edib. K.İsmayılova pandemiya dövründə həkimlərin və xəstələrin davranışları, tibb işçilərinin göstərdiyi fədakarlıq, keçirilən təlimlər və digər məqamlarla bağlı fikirlərini bölüşüb.

İştirakçılar tərəfindən maraqla qarşılanan məruzələrdən sonra konfrans müzakirələr və sual-cavabla davam edib.