İspaniyada koronavirusa qarşı hazırlanmış müxtəlif peyvəndlərin eyni şəxsdə tətbiqi ilə bağlı aparılan araşdırmanın nəticələri bəlli olub.

Aztibb.az xəbər verir ki, tədqiqat qrupu “AstraZeneca” peyvəndi olanlara ikinci doza “Pfizer” peyvəndi verilməsinin təhlükəsiz və müsbət təsirli olduğunu iddia edib.

İspaniyanın Karlos III Sağlamlıq İnstitutu tərəfindən aparılan “Combivacs” adlı araşdırmada “AstraZeneca” peyvəndi dozasından sonra “Pfizer” və “BioNTech” tərəfindən müştərək hazırlanan peyvəndlə vaksinasiya olanların qanında IgG antitellərinin 30-40 dəfə çox olduğu təsbit edilib.

Tədqiqata 18-59 yaş arasında, birinci doza “AstraZeneca” peyvəndi olan 670 nəfər qatılıb. Onlardan təqribən 450 nəfərinə ikinci doza olaraq “Pfizer” peyvəndi vurulub. İştirakçıların təxminən 2% -i əks təsirlər yaşadıqlarını bildiriblər. Bu da baş ağrısı, əzələ ağrısı və zəiflik əlamətləri ilə müşahidə edilib.

Bu tədqiqata qədər, İngiltərədə aparılan oxşar bir araşdırmanın nəticəsi isə göstərib ki, iki fərqli peyvənd tətbiq olunan insanlar hər iki dozada eyni peyvəndi vurduranlardan daha çox əks təsir yaşayıblar.

İspaniyada əvvəlcə tədqiqat qrupu “AstraZeneca” peyvəndinin gənc və orta yaşlı insanlarda qan laxtalanmasına səbəb olacağından ehtiyat edərək, yalnız 60 yaş və üzəri yaşda olanlara tətbiq edilməsinə qərar verib.

Karlos III Sağlamlıq İnstitutunun direktoru İsus Antoni Frias tədqiqatla bağlı onu da bildirib ki, nəticələrimiz birinci doza “AstraZeneca” peyvəndi olan insanların başqa bir peyvəndlə ikinci doza oluna biləcəyini müəyyən edib, lakin bunu həyata keçirməklə bağlı qərar vermək bizim məsuliyyətimiz deyil.