El arasında qulunc adı ilə tanınan, əslində isə onurğanı düzləndirən əzələnin iltihabı olan miozit daha çox oturaq həyat keçirənlərdə, xüsusən də sürücülərdə, kompüter qarşısında çox oturanlarda, döş fəqərələrində yırtıq, sürüşmə və ya osteoxondrozdan əziyyət çəkənlərdə, həmçinin daim küləkli yerdə işləyənlərdə rast gəlinir.

Aztibb.az tibbi mənbələrə istinadla xəbər verir ki, miozit hər hansı səbəbdən skelet əzələlərində baş verən iltihabi prosesdir və həmin prosesdə bir və ya bir neçə əzələ qrupu iştirak edir.

Bir çox nahiyənin əzələlərində müşahidə olunsa da, daha çox onurğanın boyun, kürək və bel hissələrində baş verir. İltihablaşan nahiyəyə əllə toxunma və hərəkət zamanı yaranan sızıltılı ağrılar və temperaturun yüksəlməsi müşahidə edilir.

Yaranma səbəbləri:

Miozitin ən geniş yayılma səbəbləri soyuq faktoru və uzun müddət məcburi vəziyyətdə qalmaqdır. Bu daha çox iş şəraiti ilə əlaqədar skripkaçı, sürücü və kompüterlə işləyən ofis işçilərində müşahidə edilir.

Onun yaranmasına səbəb olan bir sıra amillər var:

- Hava cərəyanının təsiri və soyuqlama;

- Müəyyən qrup əzələlərin uzunmüddətli eyni vəziyyətdə qalması;

- Əzələnin qıcolma və ya travma nəticəsində zədələnməsi;

- Yaxın zamanlarda keçirilmiş və hazırda müşahidə edilən kəskin virus infeksiyaları;

- Əzələlərin bakterial, parazitar, toksiki və autoimmun zədələnməsi;

Ən ağır gedişli forma əzələnin bakterial zədələnməsi nəticəsində yaranan irinli miozitlərdir ki, belə hallarda irin sinir və damarların gedişi boyu yayılaraq prosesi daha geniş sahələrə yayır.