Milli Hematologiya və Transfuziologiya Mərkəzinin (MHTM) təşkilatçılığı ilə 8 May - Beynəlxalq Talassemiya Gününə həsr olunmuş "Azərbaycan-Türkiyə talassemiya görüşləri" mövzusunda onlayn elmi seminar keçirilib. Tədbirdə türkiyəli mütəxəssislər də iştirak ediblər.

 

Aztibb.az xəbər verir ki, seminarda MHTM-in icraçı direktoru Valeh Hüseynov çıxış edərək ölkəmizdə son illərdə talassemiya xəstəliyinin müalicəsi və diaqnostikası istiqamətində mühüm tədbirlərin görüldüyünü bildirib. Qeyd edib ki, Birinci vitse-prezident, Heydər Əliyev Fondunun prezidenti Mehriban Əliyevanın təşəbbüsü ilə Talassemiya Mərkəzinin yaradılması nəticəsində talassemiyalı vətəndaşların müalicəsinin müasir səviyyədə təşkili mümkün olub.

 

Heydər Əliyev Fondunun vitse-prezidenti Leyla Əliyevanın mərkəzə olan qayğısını xüsusi vurğulayan icraçı direktor billdirib ki, hazırda MHTM-də talassemiyanın radikal müalicə üsulu olan sümük iliyi transplantasiyası uğurla həyata keçirilir. Onun sözlərinə görə, görülən tədbirlər nəticəsində talassemiyalı pasiyentlərin normal həyat fəaliyyəti təmin olunub, bu xəstəlikdən əlillik və ölüm halları azalıb.

 

Daha sonra türkiyəli professorlar Zeynep Karakaş və Namık Yaşar Özbekin, eləcə də mərkəzin mütəxəssisləri Dr. Samirə Həsənova və Dr. Nərgiz Əliyevanın məruzələri dinlənilib.