Artıq çəkidən qurtulmaq üçün lifli qidalardan geniş istifadə olunmalıdır.
Aztibb.az xəbər verir ki, mütəxəssislər tərəfindən tövsiyə olunan bu məhsullar sürətli çəki itkisinə səbəb olmaqla yanaşı, həmçinin bir sıra xəstəliklərdən də qoruyur. Həm sürətli, həm də sağlam şəkildə arıqlamaq istəyənlər bu məhsulları mütləq dieta siyahılarına salmalıdırlar.
Lifli qidaların ən önəmli tərəfi xolestrol səviyyəsini aşağı salması hesab olunur. Bu qidalar öd turşusuna təsir edərək yağ və xolesterol səviyyəsini aşağı salır, daha uzun zaman toxluq hissi yaradır. Bu funksiya qida qəbulunun müəyyən dərəcədə azalmasını da təmin edir.
Aparılan araşdırmalar göstərir ki, lifli qidalar qəbul etmək xolesterolu aşağı saldığı üçün ürək xəstəlikləri riskini 9 faiz azaldır. Bundan başqa, hər gün 7 qram lifli məhsul yemək iflic olma riskini də 7 faiz aşağı salır. Eləcə də qarşıq diet proqramları əvəzinə gündəlik lifli qidalara üstünlük vermək daha tez çəki itkisinə səbəb olur.
Tövsiyə olunan lifli qidalar siyahısında portağal, quru əncir, kakao, bulqur, qarğıdalı, taxıl məhsulları, yulaf əzməsi, badam, banan, brokoli, yaşıl noxud, avokado, nar, alma, soya, armud, çiyələk, kök, tut, böyürtkən, qabaq, turp, badımcan, kərəviz, kəpəkli makaron, fıstıq, kokos və s. yer alıb.