Avropa İttifaqının maliyyə dəstəyi ilə ÜST-ün Azərbaycan Nümayəndəliyi tərəfindən həyata keçirilən "Sağlamlıq üçün Həmrəylik Təşəbbüsü" layihəsi çərçivəsində “COVID-19 xəstələrinin klinik idarəolunması” mövzusunda vebinar keçirilib. 

 

Aztibb.az xəbər verir ki, vebinarda Bakı şəhəri və müxtəlif rayonlardan 200-ə yaxın tibb işçisi iştirak edib. 

 

Tədbiri giriş sözü ilə ÜST-ün mütəxəssisi Tural Qulu və TƏBİB-in Davamlı tibbi təhsil və tibbi təlimlər şöbəsinin məsləhətçisi Nahidə Mahmudova açaraq iştirakçılara mövzunun aktuallığı barədə məlumat veriblər.

 

Daha sonra ÜST-ün Səhiyyədə Fövqəladə Hallar Proqramının yoluxucu xəstəliklər üzrə mütəxəssisi Oqtay Gözəlov COVID-19 xəstəliyində qanın hemodinamik dəyişiklikləri haqqında danışıb.

 

Sonda hematoloq, professor Azad Hacıyev vebinar iştirakçılarını maraqlandıran sualları cavablandırıb.

 

Qeyd edək ki, növbəti həftələrdə də tibb işçilərini maraqlandıran mövzular ətrafında vebinarların keçirilməsi nəzərdə tutulur.