Azərbaycan Tibb Universitetinin (ATU) Tədris Terapevtik Klinikasında Behçet xəstəliyinə həsr olunmuş seminar keçirilib.

 

Toplantıda universitetin Tədris Terapevtik Klinikasının Revmatologiya və Qastroenterologiya şöbəsinin müdiri, ATU-nun Daxili xəstəliklər kafedrasının professoru, tibb elmləri doktoru Sahib Musayev çıxış edərək xəstəlik haqqında ətraflı məlumat verib. O, bildirib ki, vaxtında düzgün müayinə və müalicə aparılmadıqda Behçet xəstəliyi görmə qabiliyyətinin itirilməsinə də səbəb ola bilir.

 

"Behçet xəstəliyi Asiya irqinə mənsub insanlar arasında geniş yayılıb. Qanında HLA-B(5) 51 antigeni olan insanlar monitorinqə cəlb olunub nəzarətdə saxlanılmalıdır, - deyə bildirən Sahib Musayev diaqnozun vaxtında qoyulmamasının insanda görmə qabiliyyətinin itirilməsi ilə nəticələndiyini diqqətə çatdırıb. Onun sözlərinə görə, Behçet xəstəliyi əsasən ağızda avtoz xoralar, xarici cinsiyyət orqanlarında müəyyən xoralı dəyişikliklər, dəridə eritema nodozum, pustulyoz və oynaqlarda dəyişikliklərlə xarakterizə olunur. Eləcə də vaxtında diaqnoz qoyulmadıqda gözdə də ciddi dəyişikliklər baş verir.

 

Professor Sahib Musayev diaqnozun vaxtında qoyulduğu və adekvat müalicə aparıldığı təqdirdə xəstələrin uzun müddət remissiya və əmək qabiliyyətini saxlaya biləcəyini vurğulayıb.

 

Daha sonra seminarda Revmatologiya və Qastroenterologiya şöbəsinin III kurs rezidenti Sevin Həsənzadə "Çarpaz Birləşdirici Toxuma Xəstəliyi" mövzusunda çıxış edib. Bildirib ki, Overlap sindromunda xəstədə görülən diaqnostik əlamətlər iki və ya daha çox klassik autoimmun revmatik xəstəliklərinə aid ola bilər: "Hər iki xəstəliyin əlamətləri eyni dərəcədə görülə bilər və ya biri o birindən daha üstün ola bilər. Simptomları ANA və Anti ds DNT yüksək titrda pozitiv görülür. Əllərdə daha çox oynaq ağrıları (sinovit) və yumşaq (puffy) şişkinlik, əzələ ağrıları (miozit), soyuqda və stres zamanı barmaqların ağarması, göyərməsi, qizarması (Reyno fenomeni), barmaq dərisində sərtləşmə və qalınlaşma, hərarət, çəki itkisi, halsızlıq müşahidə olunur".

 

S.Həsənzadə qeyd edib ki, birləşdirici toxuma xəstəliyinin müalicəsi xəstənin vəziyyətinə və zədələnmələrə görə dəyisir. Xəstəliyin əlamətlərini tezliklə aradan qaldırmaq və uzunmüddətli nəzarətdə saxlamaq üçün revmatik dərmanların təsiri başlayanadək kortikosteroid müalicəsi aparılmalıdır.

 

Seminarda mövzu ətrafında geniş müzakirələr aparılıb, suallar cavablandırılıb.