Aztibb.az xəbər verir ki, görüşdə TƏBİB-in İdarə Heyəti sədrinin müşaviri Şəhriyar Fətullayev, Tibbi xidmətlər departamentinin rəhbəri Firəngiz Əliyeva, Tibbi ərazi bölmələrinin koordinasiyası departamentinin rəhbəri Məcid Məsimov, Elmi-tədqiqat və təhsil departamentinin rəhbəri Elmir Bəşirov və Beynəlxalq əməkdaşlıq və Protokol şöbəsinin müdiri Ramin Ağayev iştirak edib.

 

İdarə Heyətinin sədri Ramin Bayramlı M.A.Topçubaşov adına Mərkəzin əməkdaşlarının COVID-19 virusu ilə mübarizə tədbirləri çərçivəsində və Vətən müharibəsi zamanı göstərdikləri fədakarlığı yüksək qiymətləndirib və təşəkkürünü bildirib. Eyni zamanda R.Bayramlı aparılacaq səhiyyə islahatları barədə kollektivə məlumat verib, bu çərçivədə mərkəzin və digər elmi-tədqiqat institutlarının kadr hazırlığında müstəsna əhəmiyyətini vurğulayıb. Sədr aprelin 1-dən etibarən icbari tibbi sığortanın Bakı və Sumqayıt şəhərlərində, Abşeron rayonunda tətbiqinə başlanması, xidmətlər zərfinə daxil olan tibbi xidmətlərin verilməsinə dair cari məsələlər barədə danışıb.

 

Daha sonra Elmi Cərrahiyyə Mərkəzinin direktoru, professor Rauf Ağayev, Mərkəzin Kardio-cərrahiyyə şöbəsinin rəhbəri, professor Fazil Abbasov, Qaraciyər-ödyolları və mədəaltı vəz cərrahlığı şöbəsinin rəhbəri, professor Əliniyaz Məmmədov, Patomorfologiya laboratoriyasının rəhbəri, dosent Fikrət Əliyev, Anesteziologiya-reanimasiya şöbəsinin rəhbəri, professor Fuad Həsənov öz çıxışlarında görülən işlər, qarşıda duran vəzifələr və mərkəzin mövcud problemləri barədə TƏBİB-in rəhbər heyətinə məlumat verib.