“Tibbi Ərazi Bölmələrini İdarəetmə Birliyi” publik hüquqi şəxsin (TƏBİB) təşkilatçılığı ilə döyüş əməliyyatlarında iştirak edən hərbçilərə və şəhid ailələrinə psixoloji dəstək layihəsi çərçivəsində yaradılmış “Regional Psixoloji Xidmət Mərkəzləri”ndə fəaliyyət göstərən psixoloqlar üçün “Qazilərə və şəhid ailələrinə psixo-sosial dəstək” mövzusunda video formatında təlim həyata keçirilib.

 

Aztibb.az xəbər verir ki, təlimdə Türkiyənin “EMDR Travma Yaxşılaşdırma Qrupu”nun rəhbəri, psixoloq Şenel Karaman da iştirak edib.

 

Əvvəlcə çıxış edən TƏBİB-in Tibbi Xidmətlər departamentinin baş mütəxəssisi Nərmin Osmanlı hərbiçilərə və şəhid ailələrinə göstərilən xidmətin təkmilləşdirilməsi üçün hazırlanan təlim proqramlarından və görülən işlərdən bəhs edib.

 

Daha sonra təlimçi Şenel Karaman 7 saat davam edən təlimdə müharibə sonrasında yaranan psixoloji problemlər və psixoloji konsultasiya texnikaları mövzuları ətrafında çıxış edib. Sonda təlimdə iştirak edən psixoloqlarla Türkiyə və dünya təcrübəsi, psixoloqların qarşılaşa biləcəyi müxtəlif problemlər və uyğun yanaşma ilə bağlı geniş müzakirələr aparılıb.