“Tibbi Ərazi Bölmələrinin İdarəetmə Birliyi” publik hüquqi şəxsin (TƏBİB) Elmi-tədqiqat və təhsil departamentinin təşkilatçılığı ilə “Vərəmlə mübarizə sahəsində tibbi maarifləndirmənin genişləndirilməsi” mövzusunda onlayn tədbir keçirilib.
Aztibb.az xəbər verir ki, görüşdə TƏBİB-in Xəstəliklərin kontrolu və profilaktikası departamentinin rəhbəri Yaqut Qarayeva, Elmi-tədqiqat və təhsil departamentinin Davamlı tibbi təhsil və tibbi təlimlər şöbəsinin müdiri Emil İsgəndərov, TƏBİB elmi komitəsinin üzvü, 1 saylı Vərəm Əleyhinə Dispanserin baş həkimi, professor Yavər Şıxəliyev, Elmi-Tədqiqat Ağciyər Xəstəlikləri İnstitutunun direktoru, professor Həqiqət Qədirova, eləcə də vərəmli xəstələri müayinə və müalicə edən digər tibb müəssisələrinin rəhbərləri iştirak ediblər.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının katibi Nərgiz Eyvazova, Azərbaycan Milli QHT Forumunun prezidenti Rauf Zeyni, “Azərbaycan Vərəm Əleyhinə Koalisiya"nın rəhbəri Elçin Muxtarlı və 30-a qədər səhiyyə yönümlü fəaliyyət göstərən QHT rəhbəri də onlayn toplantıya qoşulub.
Tədbirdə Emil İsgəndərov tibb və səhiyyə sahəsində fəaliyyət göstərən qeyri-hökumət təşkilatları ilə birgə əməkdaşlığın uğurlu nəticələr əldə edilməsi baxımından böyük əhəmiyyət kəsb etdiyini vurğulayıb.
Departament rəhbəri Yaqut Qarayeva isə çıxışında vərəmlə mübarizə sahəsində dövlətimizin göstərdiyi diqqət və qayğıdan bəhs edib, ölkəmizdə bu xəstəliyin yayılmasının qarşısının alınması məqsədilə həyata keçirilən tədbirlərdən danışıb.
Görüşdə mövzu ətrafında geniş müzakirələr aparılıb, bir sıra məsələlərin həlli ilə əlaqədar təkliflər səsləndirilib.