Azərbaycan Respublikası Nazirlər Kabinetinin “Azərbaycan Respublikasının ərazi bütövlüyü uğrunda aparılan hərbi əməliyyatlarda iştirak etmiş hərbi qulluqçulara və şəhid ailələrinə psixoloji yardımla bağlı bəzi məsələlər barədə” qərarının icrası ilə əlaqədar Tibbi Ərazi Bölmələrini İdarəetmə Birliyi (TƏBİB) “Regional Psixoloji Mərkəzlər”inin fəaliyyəti ilə bağlı Yeni Klinikanın konfrans zalında görüş keçirilib.

 

Görüşdə TƏBİB-in Tibbi xidmətlər departamentininin baş mütəxəssisi uzman psixoloq Nərmin Osmanlı, Psixoloji Xidmət İşçi Qrupunun üzvləri, bu mərkəzlərdə xidmət gösətərəcək 25 psixoloq və 1542 Psixoloji Dəstək xəttinin əməkdaşları iştirak edib.

 

N.Osmanlı toplantı iştirakçılarına İkinci Qarabağ müharibəsində TƏBİB-in Psixoloji Xidmət İşçi Qrupu tərəfindən yaralılara və terrordan əziyyət çəkmiş mülki əhaliyə göstərilən psixoloji dəstək xidmətləri və layihələrlə bağlı məlumat verib. O, hərbi qulluqçulara və şəhid ailələrinə psixoloji yardımın göstərilməsi məqsədilə TƏBİB-in nəzdində fəaliyyət göstərən 7 tibb mərkəzində (Sumqayıt, Gəncə, Quba, Şirvan, Lənkəran, Ağdam və Şəki regionları üzrə) psixoloji yardım mərkəzlərin yaradılması, bu mərkəzlərdə fəaliyyət göstərəcək psixoloqların bilik və bacarıqlarını inkişaf etdirmək üçün təşkil edilmiş təlim proqramlarının tamamlanması, eyni zamanda Türkiyə Cumhuriyyətinin müvafiq qurum və mütəxəssisləri ilə davamlı təlim proqramlarının hazırlandığını vurğulayıb.

 

N.Osmanlı qeyd edib ki, 1542 Çağrı mərkəzinin nəzdində “Psixoloji dəstək xətti”ndə (daxili nömrə-2) fəaliyyət göstərən psixoloqlar tərəfindən telefonla və ya onlayn qaydada psixoloji dəstək xidməti göstərilir.

 

Daha sonra layihədə iştirak edəcək psixoloqlarla hərbi əməliyyatlarda iştirak etmiş hərbi qulluqçulara və şəhid ailələrinə psixoloji yardımın göstərilməsi, işçi qrupları arasında koordinasiya məsələləri və fəaliyyət mexanizmi ətrafında müzakirələr aparılıb.