Qida Təhlükəsizliyi İnstitutunun “SOVQAT - Sahibkarlıq Obyektlərinə Vahid Qida təhlükəsizliyi Anlayışının Tətbiqi” layihəsi çərçivəsində sahibkarlarla “Qida təhlükəsizliyinə dair yeni qəbul edilmiş texniki normativ hüquqi aktlar” mövzusunda müzakirə aparılıb.
Qida Təhlükəsizliyi Agentliyinin şöbə müdiri Ramazan Nəbiyev onlayn görüş iştirakçılarına aprelin 1-dən qüvvəyə minəcək qida təhlükəsizliyinə dair texniki normativ hüquqi aktlar barədə ətraflı məlumat verərək bildirib ki, “Qida məhsulları üzrə gigiyena tələblərinə dair Qaydalar” qida zəncirinin bütün mərhələlərində - ilkin istehsalı, tədarükü, istehsalı, emalı, qablaşdırılması, saxlanması, daşınması, dövriyyəsi, ictimai iaşə və xidmət sahələrində fəaliyyət göstərən müəssisələrə dair gigiyena tələblərini müəyyən edir. Qaydaların yenidən işlənib-hazırlanmasında əsas məqsəd qida zəncirinin bütün mərhələlərində ərzaq məhsullarının təhlükəsizliyinə və yararlılığına nail olunması üçün qida gigiyenasının vacib prinsiplərinin müəyyənləşdirilməsidir.
Görüşdə Qida Təhlükəsizliyi İnstitutunun Sahibkarlara xidmət departamentinin müdiri Mehran Məmmədov əlverişli və sağlam biznes mühitinin formalaşdırılması məqsədilə sahibkarlıq subyektlərinə dəstək olaraq icrasına başlanılmış “SOVQAT” layihəsinin üstünlüklərindən danışıb və onun bundan sonra da mütəmadi qaydada həyata keçiriləcəyini diqqətə çatdırıb.
Videobağlantı formatında keçirilən görüşdə sahibkarların sualları cavablandırılıb.