Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi, Türkiyənin Ankara Universiteti və Elmi Tədqiqat Pediatriya İnstitutunun (ETPİ) birgə əməkdaşlığı, “Uptodate in Medicine”nın texniki və təşkilatı dəstəyi ilə “Pediatriyada yeniliklər - 2021” adlı beynəlxalq konfrans öz işinə başlayıb.

 

Üçgünlük konfransın ilk günündə Ankara Universitetinin rektoru, professor Necdet Ünüvar, həmin universitetin professoru Ömer Erdeve və ETPİ-nin direktoru, tibb üzrə fəlsəfə doktoru Allahverdi Musayev açılış nitqləri ilə çıxış ediblər.

 

Ənənəvi olaraq hər il Azərbaycan Respublikası və Türkiyə Cümhuriyyətinin aparıcı mütəxəssislərinin iştirakı ilə keçirilən konfransda pediatriyanın aktual problemləri ilə bağlı fikir mübadiləsi aparılır, bilik və məlumatlar paylaşılır.

 

Onlayn formatda təşkil olunan beynəlxalq tədbirin keçirilməsində məqsəd uşaq sağlamlığının qorunması istiqamətində pediatr, neonatoloq, uşaq nevroloqlarının, o cümlədən digər ixtisaslı tibb işçilərinin bilik və bacarıqlarının təkmilləşdirilməsi, onların müasir yanaşma və təcrübə ilə tanış edilməsidir.

 

Konfransda edilən bütün təqdimatların video yazısı distant təhsil portalı olan www.ecourses.az-da yerləşdiriləcək.