Bu gün Mərkəzi Klinikada Vətən müharibəsində iştirak etmiş əməkdaşlarla görüş keçirilib.

Görüşdə Mərkəzi Klinikanın baş direktoru Həsən Qəndilov, baş direktor müavini Ceyhun Topçubaşov, baş həkim Kamran Musayev və digərləri iştirak ediblər.

 

Aztibb.az xəbər verir ki, əvvəlcə baş direktor Həsən Qəndilov Vətən müharibəsi iştirakçılarını salamlayaraq, müharibə dövründə Mərkəzi Klinikanın bütün kollektivinin qələbəmizin daha da yaxınlaşdırılması üçün həm arxa, həm də ön cəbhədə böyük fəallıq göstərdiyini, bütün imkanları və qüvvəsi ilə səfərbər olduğunu bildirib.

 

H.Qəndilov qeyd edib ki, döyüşlər başladığı ilk günlərdən klinikanın 8 əməkdaşı öz canları və qanları bahasına ön cəbhədə qəhrəman ordumuzun sıralarında hərbi xidmətdə olmuşlar. Bu gün həmin iştirakçıların cəbhədən qalib əsgər kimi qayıdaraq, əmək fəaliyyətlərini davam etdirmələri sevindirici haldır: "Bu müqəddəs yolda qəhrəman zabit və əsgərlərimizin bir qismi şəhid, bir qismi isə qazi oldu. Vətən müharibəsində şəhidlik zirvəsinə ucalanlardan biri də klinikamızın əməkdaşı Yusif Budaqov oldu".

 

Baş direktor əlavə edib ki, müharibə dövründə arxa cəbhədə, eləcə də Mərkəzi Klinikanın Gəncə xəstəxanasında yüzlərlə yaralıya tibbi xidmət göstərilmişdir. Gəncə xəstəxanası cəbhə bölgəsinə yaxın ərazidə yerləşdiyindən burada hərbiçilərlə yanaşı, Gəncə, Goranboy, Bərdə, Naftalan və Tərtərdə düşmənin ağır artilleriya atəşi nəticəsində yaralanmış mülki şəxslərin də müalicəsi həyata keçirilmişdir. Müharibənin aktiv fazası dövründə olduğu kimi, müharibə bitdikdən sonra da yaralılara tibbi xidmət yüksək səviyyədə davam etdirilmişdir.

 

Sonda Vətən müharibəsi iştrakçıları olan əməkdaşlar klinikanın rəhbərliyi tərəfindən “Təşəkkürnamə” ilə təltif edillib, müxtəlif hədiyyələrlə mükafatlandırılıblar.