Aztibb.az xəbər verir ki, professor Gəray Gəraybəyli ilk öncə Vətən müharibəsi zamanı göstərilən hərtərəfli dəstək üçün səfirə təşəkkür edib.

 

Görüşdə Azərbaycan və Pakistan arasında müxtəlif sahələrdə uzun illərə dayanan əməkdaşlıq münasibətlərinin tibb sahəsi üzrə də sürətli inkişafından söz açılıb, bu əməkdaşlığın genişləndirilməsi barədə fikir mübadiləsi aparılıb.

 

Son illər universitetin beynəlxalq əlaqələrinin genişləndiyini deyən ATU-nun rektoru əməkdaşlıq qurulan ali məktəblərin sayının daha da artdığını bildirib: “Hazırda dünyanın 30-a yaxın ölkəsindən olan 85-ə yaxın ali təhsil və elmi-tədqiqat qurumları ilə əməkdaşlığımız mövcuddur. ATU əcnəbi tələbə sayına görə ölkənin lider universitetidir. Belə ki, Tibb Universitetində 37 ölkədən 2526 nəfər xarici vətəndaş təhsil alır. Ali məktəbimizdə Pakistandan da 24 tələbə təhsil alır”.

 

G.Gəraybəyli Pakistandan olan tələbə sayının artırılması, gələcəyin həkimlərinin mübadiləsinin təşkili, eləcə də birgə elmi araşdırmaların aparılması üçün səyləri gücləndirməyin vacibliyini vurğulayıb.

 

Rektor 2020-ci ildə Tibb Universitetinin 90 illik yubileyinin qeyd edildiyini bildirərək, səfirə ATU-nun yubiley medalını təqdim edib.

 

Pakistanın ölkəmizdəki səfiri B.Haye isə öz növbəsində Azərbaycan hökumətini və xalqını böyük Qələbə münasibətilə təbrik edib. O, ATU ilə Pakistanın ali məktəbləri arasında əməkdaşlıq əlaqələrinin qurulması və genişləndirilməsi, qarşılıqlı layihələrin icrası ilə bağlı görüləcək işlərdən danışıb.

 

Görüşdə ATU-nun beynəlxalq əlaqələr üzrə prorektoru, dosent Orxan İsayev, Pakistan İslam Respublikasının ölkəmizdəki səfirinin köməkçisi İqbal Abdullayev da iştirak ediblər.