"Pandemiya müddətinə görə uşaqların peyvəndini sonraya saxlamaq düzgün qərar deyil".

Aztibb.az xəbər verir ki, bu barədə həkim-pediatr Aytən İsmayılzadə məlumat verib.

O, bildirib ki, uşaqlar peyvəndsiz qalarsa məhz onlar üçün təhlükəli olan başqa xəstəliklərə yoluxa və ağır keçirə bilərlər:

"Uşaqların peyvəndini bir az da sonraya saxlamayın. Epidemiyanın əvvəlində mən də dedim saxlayaq. Çünki virusa bələd deyildik. Sonra gördük ki, onun uşaqlarla işi yoxdur. Uşaqlar peyvəndsiz qalsa məhz onlar üçün təhlükəli olan göy öskürək, qızılca, difteriya kimi xəstəliklərə yoluxar və ağır keçirərlər.

Qarşıda payız gəlir, respirator xəstəliklər yayılacaq. O zaman isə deyəcəksiz "uşağın sağlam vaxtını tapmırıq ki, peyvənd edək". Düz də deyəcəksiniz. Xəstə olanda olmaz. Mütləq xəstəlikdən iki həftə ya bir ay keçməlidir. Belə olanda isə fasilə uzanır".

Uşağın peyvəndini yay olduğu üçün saxlamağın yanlış olduğunu deyən həkim, körpənin 2 ayından edilməli olduğunu vurğulayıb.

"Nə qədər kiçik aylarda edilərsə, o qədər minimum yan təsirlər görərik ( hərarət, narahatlıq və s)

• uşağınızın peyvəndini "damcı edək, iynə qalsın" deyib çeşidləməyin. Damcı bir poliomielit xəstəliyidir, iynə dediyiniz isə 5 xəstəlik ( göyöskürək, tetanus, hepatit b, hemofilus influenza, difteriya)

• uşağınızın peyvəndi üçün özəl klinika axtarmayın, öz qeydiyyatda olduğunuz yerdə etdirin. Hamısı eyni peyvənddir. Əbəs yerə övladınıza pulsuz ayrılmış peyvəndə o qədər ödəniş etməyin. Bu zaman sadəcə özəl klinika pul qazanır".

"Valideyn poliklinika sahə həkiminə peyvəndə görə zəng edir, o isə "mən COVID-19 ilə mubarizəyə ezam olunmuşam" deyir. Bu, uşağın peyvəndinin təxirə salınmasına səbəb olmalı deyil. Uşağı başqa yerdə yoxladın, yaxud həmin poliklinikada başqa sahə həkiminə göstərin. Ya uşağın adına olan peyvəndini buz içərisində versin və qeyd etsin, valideyn də aparıb hardasa vurdursun. Uşaq peyvəndsiz qalmamalıdır" - deyə, həkim heç bir halda uşaqların peyvəndinin gecikdirilməməli olduğunu bildirib.