Qida Təhlükəsizliyi Agentliyində “Qida sənayesi və ictimai iaşə sektoru: mövcud vəziyyət və perspektivlər” mövzusunda onlayn forum keçirilib.
Agentliyin İnformasiya təminatı və innovativ həllər şöbəsindən verilən məlumata görə, onlayn forumda işğaldan azad edilmiş ərazilərdə qida və ictimai iaşə müəssisələrinin yaradılması, qida və ictimai iaşə sektorunun sahibkarları ilə pandemiya və postpandemiya dövrü ilə əlaqədar müzakirələr aparılıb.
Forumda çıxış edən Qida Təhlükəsizliyi Agentliyinin sədr müavini Balarəhim Quliyev pandemiya dövründə həyata keçirilən tədbirlər barədə məlumat verib, yeni növ koronavirus (COVID-19) infeksiyası ilə mübarizə tədbirləri çərçivəsində əhali və sahibkarlar arasında geniş maarifləndirmə işlərinin aparıldığını, ictimai iaşə, turizm, qida məhsullarının ticarəti ilə məşğul olan və digər sahibkarlıq subyektlərində monitorinqlərin keçirildiyini bildirib. Beynəlxalq və yerli ekspertlərin iştirakı ilə agentliyin işğaldan azad edilmiş ərazilər üzrə fəaliyyətinə dair konsepsiya sənədinin hazırlanaraq aidiyyəti üzrə təqdim edildiyini qeyd edən sədr müavini həmin bölgələrin dirçəldilməsində sahibkarların üzərinə də məsuliyyətin düşdüyünü və bunun icrası zamanı qarşıya çıxan məsələlərin həlli zamanı onları fəal əməkdaşlığa dəvət edib.
KOBİA-nın İdarə Heyətinin sədri Orxan Məmmədov öz çıxışında torpaqlarımızın işğaldan azad edilməsinin biznes üçün yeni imkanlar açdığını, həmin bölgələrdə biznes qurmaq istəyən sahibkarlardan indiyədək çoxsaylı müraciətlərin daxil olduğunu qeyd edib. Həmin müraciətlərin əsasən istehsal, turizm, toxuculuq, tikinti, tibbi fəaliyyət, eləcə də qida sənayesi üzrə ictimai iaşə və kənd təsərrüfatı sahələrini əhatə etdiyi diqqətə çatdırılıb. Bildirilib ki, işğaldan azad edilmiş ərazilərdə biznes qurmaq və investisiya yatırmaq istəyən sahibkarlara KOBİA tərəfindən lazımi informasiya, əlaqələndirmə və məsləhət xidmətləri göstərilir.
Onlayn forumda, həmçinin qida biznesi sahəsində fəaliyyət göstərən sahibkarlıq subyektlərinin problemləri müzakirə olunub, tədbir iştirakçılarının sualları cavablandırılıb.