Nazirlər Kabinetinin 2021-ci il 16 yanvar tarixli Sərəncamı ilə təsdiq edilmiş “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na müvafiq olaraq, ölkəmizdə vaksinasiya prosesinin birinci mərhələsinə start verilib.

Bakı şəhər 5 saylı Klinik Xəstəxananın əməkdaşlarının da COVID-19 infeksiyasına qarşı peyvənd olunması uğurla davam etdirilir. 

İlk olaraq xəstəxananın baş həkimi Fazil Alməmmədov və digər rəhbər şəxslər peyvənd olunublar.

Vaksinasiya prosesi bu sahədəki mövcud qaydalara ciddi riayət olunmaqla aparılır. Peyvəndin ikinci dozası 21 gündən sonra tətbiq ediləcək.

Qeyd edək ki, təhlükəsizliyinə və effektivliyinə görə seçilən “CoronaVac” vaksini ilkin mərhələdə risk qrupuna daxil olan sakinlərə - səhiyyə işçilərinə, yaşı 65-dən yuxarı olan şəxslərə və hüquq-mühafizə orqanları tərəfindən əks-epidemik tədbirlərə cəlb edilmiş heyətə könüllülük əsasında vurulur.