Azərbaycan Tibb Universitetinin Tədris Terapevtik Klinikasının həkim kollektivinin iştirakı ilə "COVID-19 xəstə dəyərləndirilməsi və düzgün müalicə seçimi" mövzusunda seminar keçirilib.

 

Öncə klinikanın həkim-infeksionisti Aygül Əliyeva COVID-19 xəstələrinin kliniki gedişatının dəyərləndirilməsi meyarları və uyğun müalicə sxeminin seçimi haqqında geniş məlumat verib.

 

Eyni zamanda, o, hansı xəstə qrupunun mütləq şəkildə hospitalizasiya olunmalı, ciddi şəkildə izlənilməli olduğunu vurğulayaraq uyğun antiviral dərman preparatının seçimi, steroid və antikoaqulyant müalicəsinin hansı göstəricilərə əsasən və hansı miqdarda tətbiq olunması haqqında danışıb.

 

Daha sonra klinikanın Pulmonologiya şöbəsinin həkimi Günel Sadıqova müalicəsi uğurla başa çatmış ağır gedişli xəstənin stasionarda yatış müddətində müayinə və müalicəsinin subyektiv və obyektiv dəyərləndirilməsi barədə çıxış edib.

 

Seminarda, həmçinin baş həkim Fəridə Hacıyeva klinika rəhbərliyinin irad və tövsiyələrini həkimlərin diqqətinə çatdırıb.