Ümumdünya Səhiyyə Təşkilatı (ÜST) Avropada gənclər arasında koronavirusa yoluxma hallarının artması barədə xəbərdarlıq edib.
Aztibb.az BBC telekanalına istinadla xəbər verir ki, bu barədə ÜST-ün Avropa üzrə regional direktoru Hans Klüqe deyib.
“Biz gənclər arasında yeni yoluxma hallarının çoxalması ilə bağlı bir neçə səhiyyə orqanından məlumat alırıq”, - deyə H.Klüqe bildirib. “İki qız atası olaraq gənclərin yay mövsümünü əldən buraxmamaq istəyini başa düşürəm. Lakin onlar özləri, valideynləri, nənə və babaları, ictimaiyyət qarşısında məsuliyyət daşıyırlar. İndi biz sağlam tərzdə davranış qaydalarını bilirik və bundan istifadə etməliyik”, – deyə ÜST nümayəndəsi əlavə edib.
H.Klüqe gənclər arasında xəstəliyin artmasının bütün qitədə infeksiyanın yayılma dalğasının güclənməsi səbəbindən baş verdiyini istisna etmir. Onun sözlərinə görə, bu səbəbdən hakimiyyət orqanları yoluxma riskinin azaldılması qaydalarına riayət edilməsinin vacibliyini izah etmək üçün cəmiyyətin gənc üzvləri ilə yaxşı ünsiyyət qurmalıdır.