Mərkəzi Gömrük Hospitalının Reanimasiya şöbəsinin rəisi Dr. Tural Sadıqov ARB 24 TV-nin efirində yayımlanan "İşgüzar səhər" verilişində koronavirus xəstələrinin müalicəsi, eləcə də virusla mübarizədə vaksinasiyanın əhəmiyyəti barədə ətraflı məlumat verib. Həkim bildirib ki, vaksinin insanı neçə müddət ərzində koronavirusdan qoruyacağı ilə bağlı dəqiq məlumat hələ ki yoxdur. Bunu yalnız gedişatda müəyyənləşdirmək olar. 

 

Həkimin sözlərinə görə, koronavirus əleyhinə vaksinin təqribən 3-6 ay ərzində COVID-19-u keçirmiş xəstələri virusa yenidən yolxumadan qoruya biləcəyi ehtimal olunur.

 

"Xəstəliyin müalicəsi yalnız həkimin göstərişi ilə olmalıdır", - deyən T.Sadıqov son zamanlar ağır xəstələrin sayının artmasına səbəbin qeyri-düzgün müalicə olduğunu söylədi. Göstəriş olmadan antibiotiklərdən, müxtəlif preparatlardan istifadənin mənfi nəticələr verdiyini dedi.