Azərbaycan Tibb Universitetinin Elmi Araşdırmalar Mərkəzində müasir biologiya və təbabətin prioritet istiqamətlərindən olan kök hüceyrə tədqiqatlarına həsr olunmuş elmi seminar keçirilib.

Bu barədə Aztibb.az-a ATU-dan məlumat verilib.

Bildirilib ki, seminarda biologiya üzrə fəlsəfə doktoru İnci Şıxaliyeva “Kök hüceyrə izolyasiyası və identifikasiyası” mövzusunda ətraflı məruzə ilə çıxış edib. Məruzəçi kök hüceyrələrin toxuma və orqanlardan izolyasiyası, onların in vitro şəraitdə kultivasiyası üsulları, eləcə də identifikasiyasında tətbiq edilən müasir molekulyar və hüceyrə texnologiyaları barədə geniş məlumat verib.

Təqdimatda kök hüceyrələrin fenotipik xüsusiyyətlərinin təyinində axın sitometriyası (flow cytometry) və immunoflüoresensiya metodlarının rolu, spesifik hüceyrə markerlərinin diaqnostik əhəmiyyəti və hüceyrələrin diferensiasiya potensialının dəqiq qiymətləndirilməsi məsələləri xüsusi vurğulanıb.

Dinləyicilər tərəfindən böyük maraqla qarşılanan məruzənin sonunda mövzu ətrafında geniş fikir mübadiləsi aparılıb. Məruzəçi tədqiqatçıların və gənc alimlərin çoxsaylı suallarını ətraflı cavablandırıb.

Keçirilən elmi seminar kök hüceyrə biologiyası və regenerativ təbabət sahəsində yeniliklərin mənimsənilməsi, nəzəri və praktiki biliklərin zənginləşdirilməsi baxımından iştirakçılar üçün son dərəcə əhəmiyyətli və faydalı olub.