Hepatit C virusu qaraciyəri zədələyərək uzunmüddətli fəsadlara səbəb ola bilən, lakin erkən aşkarlanıb müalicə olunduqda qarşısı alına bilən infeksiyalardan biridir.

Aztibb.az xəbər verir ki, hepatoloq Tofiq Əkbərovun sözlərinə görə, xəstəliyin uzun müddət heç bir əlamət vermədən inkişaf etməsi onun vaxtında aşkarlanmasını çətinləşdirir və buna görə risk qrupuna daxil olan şəxslərin müayinədən keçməsi xüsusi əhəmiyyət daşıyır.

Mütəxəssisin sözlərinə görə, hepatit C virusu əsasən qan vasitəsilə ötürülür və müalicə edilmədikdə xroniki infeksiyaya, qaraciyər sirrozuna, hətta qaraciyər xərçənginə səbəb ola bilər. Xəstəliyin simptomsuz keçməsi insanın özünü sağlam hiss etsə belə, virusa yoluxmadığı anlamına gəlmir.

Hepatit C-nin aşkarlanması üçün ilkin mərhələdə anti-HCV anticisim testi aparılır. Nəticə müsbət olduqda, aktiv infeksiyanın olub-olmadığını müəyyənləşdirmək üçün HCV-RNT testi tələb olunur. Diaqnoz təsdiqləndikdən sonra müalicə həkim tərəfindən fərdi qaydada planlaşdırılır.

Müasir antiviral preparatlar hepatit C virusunu əksər hallarda orqanizmdən tam təmizləməyə imkan verir. Buna görə erkən diaqnoz, vaxtında müalicə və həkim nəzarəti xəstəliyin ağır fəsadlarının qarşısının alınmasında mühüm rol oynayır.