Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunda keçirilən ənənəvi səhər konfransında institutun uzunillik əməkdaşı, Yenidoğulmuş və Vaxtındanqabaq Doğulmuş Uşaqların Patologiyası Elmi Şöbəsinin rəhbəri, tibb üzrə fəlsəfə doktoru, dosent Mahirə Ziyəddin qızı Əfəndiyevanın yubileyi qeyd olunub.

Aztibb.az xəbər verir ki, konfrans zamanı Mahirə Əfəndiyevanın uzunillik səmərəli fəaliyyəti, pediatriya elminin inkişafına verdiyi töhfələr və instituta həsr etdiyi ömür yolu yüksək qiymətləndirilib. Kollektiv tərəfindən yubilyar təbrik olunub, ona möhkəm cansağlığı, uzun ömür və gələcək fəaliyyətində uğurlar arzulanıb.

Mahirə Əfəndiyeva Azərbaycan Tibb Universitetinin Pediatriya fakültəsini fərqlənmə diplomu ilə bitirib. Həmin ildən əmək fəaliyyətinə Elmi-Tədqiqat Pediatriya İnstitutunda başlayan alim kiçik elmi işçi vəzifəsindən böyük elmi işçi vəzifəsinədək yüksəlib, 1997-ci ildən isə Yenidoğulmuş və Vaxtındanqabaq Doğulmuş Uşaqların Patologiyası Elmi Şöbəsinə rəhbərlik edir. Beləliklə, onun pediatriya sahəsindəki fəaliyyəti 53 ili əhatə edir.

Mahirə Əfəndiyeva elmi fəaliyyətini davam etdirmək məqsədilə Moskvada, SSRİ Tibb Elmləri Akademiyasının Elmi-Tədqiqat Pediatriya İnstitutunda əyani aspiranturada təhsil alıb. 1980-ci ildə namizədlik dissertasiyasını uğurla müdafiə edib, 1991-ci ildə isə böyük elmi işçi elmi adına layiq görülüb.

Alim elmi fəaliyyəti ərzində 220-yə yaxın elmi işin, 9 metodik vəsaitin və 1 səmərələşdirici təklifin müəllifi olub. Onun elmi məqalələri yerli və beynəlxalq nüfuzlu jurnallarda, eləcə də müxtəlif konqreslərin materiallarında dərc edilib. 2010-cu ildə Mahirə Əfəndiyeva “Sədaqətli Əliyevçi” fəxri diplomu ilə təltif olunub.

Mahirə Əfəndiyevanın uzunillik fəaliyyəti, elmi araşdırmaları və pediatriyanın inkişafına verdiyi töhfələr onun Azərbaycan tibb elminə xidmətinin mühüm göstəricisidir.