Şirvan Şəhər Mərkəzi Xəstəxanasında 10 yaşlı pasiyent üzərində endoskopik üsulla qulaq əməliyyatı uğurla həyata keçirilib.

 

Bu məlumat Aztibb.az-a Xəstəxanadan verilib.

 

Bildirilib ki, kəskin respirator virus infeksiyasından (KRVİ) sonra eşitmə zəifliyindən şikayət edən pasiyentə aparılan endoskopik müayinə nəticəsində ikitərəfli eksudativ orta otit diaqnozu qoyulub və müvafiq müalicə başlanılıb.

 

Təkrar müayinələrə və əlavə müalicəyə baxmayaraq, səkkiz həftədən artıq davam edən və müalicəyə tabe olmayan eksudat səbəbindən müvafiq klinik protokola uyğun olaraq təbil pərdəsinin şuntlanması əməliyyatı icra edilib.

 

Endoskopik görüntüləmə altında aparılan əməliyyat zamanı hər iki qulağa silikon Sheppard tüpü yerləşdirilib, qatı eksudatın bir hissəsi aspirasiya edilərək təmizlənib.

 

Əməliyyat Şirvan Şəhər Mərkəzi Xəstəxanasının həkim-otorinolarinqoloqu Rövşən Məhərrəmov tərəfindən uğurla həyata keçirilib.