Ana və uşaq sağlamlığının qorunması istiqamətində TƏBİB-in tətbiq etdiyi patronaj xidməti Quba rayonunda da uğurla davam etdirilir.

Quba RMX-dan Aztibb.az-a bildirilib ki, həyata keçirilən patronaj ziyarətləri çərçivəsində 800 ailə əhatə olunub. Ziyarətlər zamanı 163 hamilə, 84 zahı və 553 uşaq müayinədən keçib.

Patronaj ziyarətləri zamanı tibb bacıları uşaqların inkişafını qiymətləndirir, valideynlərə uşağa qulluq, qidalanma, xüsusilə ana südü ilə qidalanmanın üstünlükləri, uşaqla ünsiyyət və onun inkişafının dəstəklənməsi barədə məlumat və tövsiyələr veriblər.

Eyni zamanda, hamilənin və ya körpənin yaşadığı mühit də qiymətləndirilib. Hər hansı risk müəyyən edildikdə, onun aradan qaldırılması üçün müvafiq tövsiyələr verilib və zərurət yarandıqda ailələr aidiyyəti üzrə yönləndiriliblər.