Səhiyyə Nazirliyinin İctimai Səhiyyə və İslahatlar Mərkəzinin (İSİM) və Azərbaycan Tibb Universitetinin (ATU) Nevrologiya və tibbi genetika kafedrasının birgə təşkilatçılığı ilə “Uşaqlarda epilepsiya üzrə klinik protokolun təqdimatı”na həsr olunmuş elmi-praktik konfrans keçirilib.

Bu barədə Aztibb.az-a ATU-dan məlumat verilib.

Bildirilib ki, tədbir uşaqlarda epilepsiyanın diaqnostikası, təsnifatı, müalicəsi və uzunmüddətli idarə olunması üzrə hazırlanmış klinik protokolun təqdim edilməsi, səhiyyə mütəxəssislərinin protokolun tətbiqi ilə bağlı bilik və bacarıqlarının artırılması məqsədi daşıyıb. Konfransın məqsədləri BMT-nin Dayanıqlı İnkişaf Məqsədlərinin (DİM) “Yaxşı səhiyyə və rifah” (Məqsəd 3) və “Keyfiyyətli təhsil” (Məqsəd 4) istiqamətlərinə uyğun olaraq, uşaqlara göstərilən tibbi yardımın keyfiyyətinin yüksəldilməsinə və davamlı tibbi təhsilin dəstəklənməsinə yönəlib.

İSİM-in Metodiki şöbəsinin müdiri Billurə Yusifova, tibb elmləri doktoru, professor, ATU-nun Nevrologiya və tibbi genetika kafedrasının müdiri Aytən Məmmədbəyli, tibb üzrə fəlsəfə doktorları dosent Nailə Abbasova,assistent Sona Əliyeva, Mədinə Tağıyeva ,  eləcə də baş laborant Ülkər Mürsəlova,  assistent Samirə İsmayılova və dissertant Günel Lətifova geniş təqdimatla çıxış ediblər.

Çıxışlarda neonatal və infantil dövrlərin, uşaqlıq və yeniyetməlik yaşlarının epileptik sindromları, epilepsiyanı təqlid edən qeyri-epileptik paroksizmal vəziyyətlər, epilepsiya və neyroinkişaf pozğunluqları və digər mövzular barədə ətraflı məlumat verilib. Klinik halların müzakirəsi zamanı xəstəliyin müxtəlif təzahürləri və diaqnostik yanaşmalar diqqətə çatdırılıb.