Azərbaycan Tibb Universitetinin (ATU) Tədris Cərrahiyyə Klinikasında “Genital sistem infeksiyalarının diaqnostikasında müasir laborator metodların tətbiqi və klinik-diaqnostik əhəmiyyəti” mövzusunda elmi-praktik seminar keçirilib.
Bu barədə Aztibb.az-a ATU-dan məlumat verilib.
Bildirilib ki, tədbirdə ATU-nun Tədris Cərrahiyyə Klinikasının Klinik-diaqnostik laboratoriyasının müdiri Leyla Həşimova genital sistem infeksiyalarının müasir laborator diaqnostikası və klinik əhəmiyyəti barədə məruzə ilə çıxış edib.
Məruzəçi genital infeksiyaların qlobal səhiyyənin aktual problemlərindən biri olduğunu, onların əhəmiyyətli hissəsinin simptomsuz keçdiyini və vaxtında aşkarlanmadıqda reproduktiv sağlamlıq üçün ciddi fəsadlara səbəb ola biləcəyini vurğulayıb. Bu baxımdan, törədicilərin dəqiq müəyyənləşdirilməsinin, xüsusilə ənənəvi kultivasiya üsulları ilə aşkarlanması çətin olan mikroorqanizmlərin diaqnostikasında molekulyar metodların tətbiqinin vacibliyi qeyd edilib.
Seminarda laborator müayinələrin preanalitik mərhələsində yol verilən xətaların nəticələrin etibarlılığına təsiri, bioloji materialların düzgün götürülməsi, saxlanılması və daşınması, müayinə metodlarının klinik göstərişlərə uyğun seçilməsi və nəticələrin düzgün interpretasiyası müzakirə olunub. Həmçinin antimikrob rezistentlik, diaqnostik proseslərin standartlaşdırılması, laborator müayinələrin keyfiyyətinin yüksəldilməsi və laborator nəticələrin klinik qərarvermədə rolu diqqət mərkəzində olub.
Tədbirdə Dövlət Təhlükəsizliyi Xidmətinin Hospitalı, Neftçilər Xəstəxanası, Uroloji Xəstəxana, Universal Hospital, LUX International, İnci Laboratoriyaları, Prime Hospital və digər tibb müəssisələrinin laboratoriya rəhbərləri və müvafiq sahə üzrə mütəxəssislər iştirak ediblər. İştirakçılar müasir diaqnostik texnologiyaların tətbiqi, praktik fəaliyyətdə qarşılaşılan çətinliklər və klinik həkimlərlə laboratoriya mütəxəssisləri arasında əməkdaşlığın gücləndirilməsi ətrafında fikir mübadiləsi aparıblar.
Seminar laborator diaqnostika sahəsində müasir elmi yanaşmaların və praktiki təcrübənin paylaşılması, eləcə də klinik-laborator əməkdaşlığın inkişafı baxımından əhəmiyyət daşıyıb.
