Rusiyada bir neçə yeni vaksinin hazırlanması istiqamətində iş aparılır. Söhbət ambroziya allergiyasına, meningokok infeksiyasına və denqe qızdırmasına qarşı vaksinlərdən gedir. Paralel olaraq Federal Tibbi-Bioloji Agentlik (FMBA) qlioblastomanın müalicəsi üçün fərdiləşdirilmiş preparat üzərində də çalışır.
Aztibb.az "Kommersant" qəzetinə istinadən yazır ki, bu barədə agentliyin rəhbəri Veronika Skvortsova “Bioprom” forumunda məlumat verib.
Skvortsovanın sözlərinə görə, növbəti mərhələyə ən yaxın olan layihə ambroziya tozcuğuna qarşı allergiyanın müalicəsi üçün preparatın hazırlanmasıdır. Onun sözlərinə görə, preparat artıq qeydiyyata alınmaq üzrədir.
Bununla yanaşı, ağcaqayın tozcuğuna qarşı allergiya və çarpaz qida allergiyasına qarşı ilk Rusiya allergiya vaksini olan “Allergarda” ötən həftə qeydiyyata alınıb. Preparatın artıq oktyabr ayında mülki dövriyyəyə buraxılması planlaşdırılır.
FMBA meningokok infeksiyası və denqe qızdırmasına qarşı preparatların hazırlanması üzərində də işi davam etdirir. Sonuncu preparat artıq klinik tədqiqatlar mərhələsinə keçib.
Ayrıca istiqamətlərdən biri fərdiləşdirilmiş onkoloji vaksinlərin hazırlanmasıdır. Agentlik daha əvvəl kolorektal xərçəngin müalicəsi üçün preparat təqdim edib. Hazırda isə aqressiv beyin şişi olan qlioblastomadan əziyyət çəkən pasiyentlər üçün preparat hazırlanır. Bu texnologiyanın klinikadan əvvəlki sınaqları 2026-cı ilin əvvəlində başa çatdırılıb.
