Azərbaycan Tibb Universiteti (ATU) Norveçdə keçirilən “SIG Mobility In-between Meeting 2026” adlı beynəlxalq elmi tədbirdə təmsil olunub.
Bu məlumat Aztibb.az-a ATU-dan verilib.
Bildirilib ki, ATU-nun Nevrologiya kafedrasının assistenti, tibb üzrə fəlsəfə doktoru Nuridə Tağıyeva tədbirdə “Yeni diaqnoz qoyulmuş dağınıq skleroz xəstələrində erkən multidissiplinar reabilitasiya: mövcud sübutlar və klinik yanaşmalar” mövzusunda elmi məruzə ilə çıxış edib.
Məruzədə dağınıq skleroz zamanı erkən və fərdiləşdirilmiş multidissiplinar reabilitasiyanın əhəmiyyəti, funksional problemlərin vaxtında qiymətləndirilməsi və pasiyentlərin həyat keyfiyyətinin qorunmasına yönəlmiş müasir yanaşmalar təqdim olunub.
Beynəlxalq görüş müxtəlif ölkələrdən olan mütəxəssislərlə elmi təcrübə mübadiləsi, müasir reabilitasiya yanaşmalarının müzakirəsi və beynəlxalq əməkdaşlığın inkişafı baxımından mühüm platforma olub.
