Azərbaycan Tibb Universitetinin (ATU) uşaq və yeniyetmələrdə baş ağrılarının öyrənilməsinə həsr olunmuş elmi tədqiqatının ilkin nəticələri III Baltik Baş Ağrısı Konqresində təqdim olunub. 

Universitetdən Aztibb.az-a verilən məlumata görə, ATU-nun Nevrologiya kafedrasının dissertantı Sərxan Əmirquliyev konqresdə “Distribution of primary headache disorders in children and adolescents” adlı elmi işlə çıxış edib. Tədqiqat beynəlxalq mütəxəssislərin marağına səbəb olub. 

Elmi iş ATU-nun Azərbaycan Respublikasının Elm və Təhsil Nazirliyi ilə birgə həyata keçirdiyi genişmiqyaslı layihə çərçivəsində hazırlanıb. Professor Aytən Məmmədbəylinin rəhbərlik etdiyi layihənin əsas məqsədi Azərbaycan məktəblərində uşaqlar və yeniyetmələr arasında baş ağrılarının, xüsusilə miqrenin yayılma səviyyəsinin və klinik xüsusiyyətlərinin öyrənilməsidir. 

Tədqiqat çərçivəsində uşaq və yeniyetmələr arasında baş ağrılarının yayılması, müxtəlif baş ağrısı növlərinin xüsusiyyətləri və onların klinik göstəriciləri araşdırılır. 

Ümumilikdə layihənin baş ağrılarının daha erkən aşkarlanması, düzgün diaqnostikası və müalicə yanaşmalarının təkmilləşdirilməsinə töhfə verəcəyi gözlənilir.